有些電影，無論故事和角色發展如何，我們都會買飛入場支持。
「志明與春嬌」系列來到第三集《春嬌救志明》，繼續大玩集體回憶和廣東流行曲。千嬅在片中大唱經典卡通片《小雙俠》主題曲和陳百強的《當我想起你》、幾個閨蜜更齊齊又跳又唱Raidas的《傳說》……有哪個70、80後沒共鳴？
《志明與春嬌》是2010年上映，兩年後有《春嬌與志明》，千嬅更以本片奪得《香港電影金像獎》「最佳女主角」。相隔5年，第三集《春嬌救志明》仍然令人期待。

能夠令一眾觀眾大感共鳴，戲中的音樂和歌曲絕對非常重要。《春嬌與志明》中的《我的歌聲裡》大受歡迎，而王馨平的《別問我是誰》更再度爆紅！今集《春嬌救志明》主題曲更找來五月天主唱，而導演將自己喜愛的卡通人物《小雙俠》融入劇情，戲中春嬌大唱主題曲，但志明卻完全未聽過，令春嬌非常激氣。（但其實在優先場的幾個行家朋友，明明是同年代，都一樣唔識唱，春嬌唔使嬲啦！）。而戲中幾個姊妹齊齊翻唱Raidas的經典歌《傳說》，早前千嬅等人更以新晉組合「MKB48」之名到推出此歌。識唱的朋友一齊唱！所謂七年之癢，今次志明與春嬌仍然徘徊於分手和復合之間，年屆40的春嬌心煩、多疑，志明卻由人渣變成好男人，兩人產生的「感情危機」令不少觀眾看得既肉緊又忟憎。其實我們都是春嬌，面對另一半的女性密友，又要扮大方又要唔抵得；兩人生活生活久了，慢慢看對方不順眼，我有我儲錢買樓，你有你繼續買「無謂嘢」和所謂潮物；有時又會容易生疑，覺得對方不再愛自己……不過，當志明都可以由人渣變好男人，各位姊妹不妨好好跟志明與春嬌借鏡，希望在明天呀！

Text: Lam Wing Kee