自從碧咸退咗役之後，碧咸迷就真係幸福咯，因為碧咸一有時間就會嚟吓香港、去吓澳門同上海，傾吓生意呀、做吓代言咁。咁佢當然特別鍾意香港啦，可以順便幫老婆巡吓舖吖嘛。

佢今日又旋風式襲港喇，應AIA嘅邀請成為咗佢哋嘅保險大使，如果我個保險經紀係碧咸咁型嘅話，我願意將成條命奉獻畀佢架！發完白日夢，講返正題！查實碧咸今年40有1架喇，雖然佢今日著住厚厚嘅西裝，但我哋咁近距離直擊，見佢副body仲keep得好好。嗱！唔係我作架，碧咸嗰次喺2014年訪港嘅時候，一落地就第一時間喺Facebook update，仲話香港係全世界最靚嘅城市添呀。佢呢件緊身casual橙色tee，再加埋個眼鏡掛衫嘅造型，盡顯碧咸親民形象。
要數碧咸襲港最經典嘅一次，當然係佢官仔骨骨咁突然出現喺荔枝角街頭啦。其實碧咸引退之後，已經諗緊進軍唔同界別，出咗自己嘅威士忌啦，仲同利豐老闆Bruce密密斟，可能想同老婆夫妻檔做時裝大亨！碧咸粉絲都知佢2008年專登去尖沙咀搵香港首席紋身師沈龍威師傅紋咗一列八字真言「生死有命富貴由天」，原來當年沈師傅提議過碧咸紋另一組八字真言「物極必反否極泰來」，不過碧咸話佢當時心境仲未去到嗰個化境階段，所以揀咗前者，仲話以後當佢進入化境，一定會返去搵沈師傅架！大半年前，碧咸真係自己嚟咗香港，專登去中環置地巡視老婆嘅業務㗎。佢呢個賊仔帽白波鞋look，都迷到唔少男生女生㗎！其他男性自拍會令人覺得噁心，唯獨萬人迷，做乜都咁型，尤其係呢張泳池邊show肌肉經典自拍……如果可以拍落啲就好喇~~碧咸2015年父親節前都有路過香港，再去咗澳門主持H&M澳門店開幕。碧咸同咸嫂錫仔女係人都知，佢話父親節唔恨收禮物，最緊要係仔女錫佢攬佢。其實老竇咁型咁靚仔，做仔女又點會唔錫佢！佢之後著住套深藍色橫間H&M去咗支持澳門傷殘奧運嘅運動員，仲超有愛心咁逐個hug hug……這些機會！呢次保險代言之旅嘅前夕，咸爺喺上海打過卡架。灰色冷帽look再加碧咸經典迷人笑容，張相post出嚟無耐就已1M個❤~~最後，送上萬人迷喺大陸著住西裝皮鞋踢草地跣腳照一張。好明顯萬人迷無論去到邊，著住咩衫都會被要求表演七旋斬，見到佢跣得咁甘，係會有啲心痛嘅，但見佢依然係好型，41歲依然一啲肚腩都無，萬人迷之名真係實至名歸嘅。

Text > Goosie Lam
Images > David Beckham Facebook, Twitter and Instagram, internet